A wnest ti ddilyn addysg bellach neu uwch?

Ces i 9 TGAU yn yr ysgol ac es i ymlaen i astudio Safon Uwch yng Ngholeg Crosskeys. Ymgeisiais i Brifysgol Abertawe i astudio’r Gyfraith ac, ar ôl mynd drwy glirio, roeddwn i’n ddigon ffodus i gael lle. Roeddwn i’n dwlu ar y brifysgol. Dyna oedd un o gyfnodau gorau fy mywyd ac, a bod yn onest, mae’n bosib y mwynheais i ychydig yn ormod! Roeddwn i wrth fy modd yn byw yn ninas Abertawe a chael profiad ohoni, sydd lawer yn fwy na lle ces i fy magu yn Abertyleri! Roedd y brifysgol yn drobwynt pwysig yn fy mywyd. O oedran ifanc, ces i fy mwlio yn yr ysgol am fod yr un ‘deallus’ ac roeddwn i’n darged hawdd i bobl oherwydd roedd gen i ddiddordeb mewn addysg. Cafodd y bwlio effaith fawr a niweidiol iawn ar fy hunanhyder, ac roedd e wedi gwneud i fi feddwl na fyddwn i byth yn llwyddo i wneud llawer, ac yn sicr dim byd arwyddocaol na phwysig. Roedd fy rhieni’n amddiffynnol iawn a dw i’n credu y cafon nhw eu synnu’n fawr pan ddywedais i fy mod i’n mynd i brifysgol Abertawe achos dw i ddim yn credu roedden nhw’n meddwl bod yr hyder gen i i symud mas a symud ymlaen. Ond dyna wnes i, gan wybod mai’r brifysgol fyddai ddechrau gweddill fy mywyd.

Beth ddysgaist ti am fywyd yn y brifysgol?

Dysgais i wersi bywyd gwerthfawr iawn o’r brifysgol. Dangosodd i fi os ydych chi am rywbeth digon, mae e lan i chi i fynd amdani a llwyddo! Roeddwn i’n ysu am allu profi’r bwlis yn anghywir. Roeddwn i’n gwybod y byddai llwybr fy mywyd yn cael ei benderfynu ar sail fy newisiadau i, ac oherwydd yr holl bethau negyddol roeddwn i wedi eu profi wrth dyfu i fyny, roeddwn i’n hollol benderfynol i wneud y penderfyniadau iawn. Yn ystod fy ngradd, sylweddolais i nad oedd y Gyfraith yn iawn i fi, collais i ddiddordeb a chymhelliad. O ganlyniad i’m penderfyniad, daliais ati ond roeddwn i’n siomedig iawn i gael gradd 3ydd dosbarth. Tangyflawnais i a theimlais i fy mod i wedi gwastraffu 3 blynedd o’m mywyd. Roeddwn i wedi methu fy hun ac, yn bwysicach byth, fy nheulu hefyd gan eu bod nhw wedi fy nghefnogi’n emosiynol ac yn ariannol am gymaint o amser. Mae hyn oll yn swnio’n negyddol iawn ond dyna’r pwynt yn fy mywyd lle sylweddolais i’n llwyr fod angen i fi newid cyfeiriad, cael ffocws newydd a chael amcanion newydd er mwyn symud ymlaen.

I ba gyfeiriad est ti ar ôl y brifysgol?

Ar ôl y brifysgol, penderfynais i aros yn Abertawe a chael swydd. Yn naïf, roeddwn i’n meddwl y byddwn i’n glanio mewn swydd dda gyda gradd yn y Gyfraith ac roeddwn i’n meddwl bod llawer o swyddi ddim yn ddigon da i fi. Ond 6 mis yn ddiweddarach, roeddwn i dal yn ddi-waith, a daeth y realiti’n gwbl amlwg i fi pan fu’n rhaid i fi ymuno â’r ciw am fudd-daliadau i bobl ddi-waith, roedd gen i gwylidd mawr dros wneud hyn. Cododd yr argraff wael sydd gan bobl o bobl sy’n hawlio Lwfans Ceisio Gwaith fraw arna i, ond doedd dim byd arall amdani. Er gwaethaf fy amheuon cychwynnol, ces i gefnogaeth dda ac wedi 6 mis, ces i le ar raglen a gynhaliwyd gan Ddinas a Sir Abertawe i gefnogi pobl i gael gwaith drwy leoliadau â thâl. Fe ges i lleoliad gwaith gyda gwasanaeth dysgu gydol oes a hyfforddiant ar gyfer cyflogaeth (LLETS) ac, er gwaethaf fy ansicrwydd ar y dechrau, datblygais i lawer o sgiliau, a llawer o hunangred hefyd. Dechreuais i feddwl efallai y gallwn ei wneud wedi’r cwbl. Ar ôl 6 mis, ces i gynnig swydd fel Swyddog Cyswllt Cyflogwyr fel rhan o raglen Gweithffyrdd a pharheais i gael mwy o brofiad. Arhosais gyda’r cwmni hwn am 5 mlynedd a symudais i ymlaen i’r rôl o Gydlynydd Cynnwys Swyddi Dan Hyfforddiant. Yn 23 oed, fi oedd un o’r rheolwyr ifancaf  a theimlais i’n dda amdanaf i fy hun am y tro cyntaf mewn amser hir. Roedd ffrindiau a oedd gen i yn y brifysgol ar gytundebau dan hyfforddiant ac yn ennill llawer yn llai na fi, ac roedd hyn yn help i dderbyn fy hun. O’r diwedd, teimlais i’n hyderus yn y dewisiadau a wnes i ac roedd gen i gymhelliad newydd i wthio fy hun i lwyddo yn fy amcanion gyrfa mwy.

Sut mae’ch gyrfa wedi datblygu ers hynny?

Fy swydd rheoli gyntaf oedd cyflenwi yn ystod cyfnod mamolaeth am flwyddyn, ac ar ôl hynny, cafodd fy swydd ei dileu. Roedd yn anodd i fi am 3-4 blynedd ar ôl hyn i gyrraedd yn ôl i‘r lefel lle roeddwn i am fod. Collodd y Cyngor y cytundeb ar gyfer y swyddi dan hyfforddiant ac aeth y cytundebau hyn i Rathbone Training, lle ces i swydd, yn gyntaf fel Tiwtor Sgiliau i Hanfodol, gan symud ymlaen yn gyflym i Diwtor Arweiniol. Roeddwn i’n ôl yn gweithio mewn swyddi rheoli gyda chyfrifoldebau cynyddol ac roeddwn i’n ffynnu, ond yn bendant, roedd llawer o heriau. Fel sefydliad elusennol, nid oedd llawer o gyllid felly roedd yn rhaid i fi wneud cymaint â phosib am dâl pitw. Dechreuais i flino ac arweiniodd fy anfodlonrwydd ataf yn chwilio am gyfleoedd eraill. Dyna pryd gwelais i’r rôl fel Cydlynydd Prosiect yng Ngholeg Gŵyr Abertawe. Roedd y rôl yn ymddangos yn berffaith i fi felly cyflwynais gais, ces i’r swydd a doeddwn i fethu â chredu’r peth! Dros y tair blynedd diwethaf gyda’r coleg, rydw i wedi bod yn lwcus iawn i symud ymlaen ymhellach ym maes rheoli, yn gyntaf i rôl Rheolwr Rhaglen, cyn symud ymlaen i rôl Ddirprwy Gyfarwyddwr. Nawr, rydw i’n gwneud yr hyn rydw i wedi bod eisiau ei wneud erioed – darparu cymorth rheoli i i adran o bobl sydd ag angerdd am helpu pobl. Mae’r adran bellach yn cwrdd â phobl y bûm yn gweithio gyda nhw 11-12 mlynedd yn ôl; pobl a oedd mewn sefyllfaoedd truenus heb unrhyw obaith sydd bellach yn gallu cael swyddi, morgeisi a’u teuluoedd eu hunain. Mae’r straeon hyn yn fy atgoffa o’r hyn dw i’n ei wneud a pham y mae’r rhaglen yn hanfodol er mwyn cynnig gobaith, rhagolygon a bywyd llawn sy’n werth ei fyw i bobl.

Beth yw’r un peth rwyt ti’n dyfaru peidio â gwybod pan oeddet ti’n ifancach?

Byddwn i wedi eisiau cael yr wybodaeth sydd gen i nawr am gyflogadwyedd oherwydd fy mod i’n wirioneddol frwdfrydig am bwysigrwydd cefnogaeth gyrfa werthfawr. Dw i dal yn gallu bod yn rhwystredig iawn nad oes gan gymaint o bobl y sgiliau hanfodol y mae eu hangen arnynt i lwyddo, yn syml oherwydd nad ydynt erioed wedi cael eu dysgu neu does neb wedi dangos iddynt. Dw i’n dyfaru nad oedd gen i’r wybodaeth i helpu pobl yn gynt oherwydd dw i’n meddwl yn aml y rhai hynny a gwympodd drwy’r rhwyd ac sydd bellach yn ymdopi â chanlyniadau diffyg cefnogaeth hanfodol. Peth arall byddwn i wedi am wybod pan oeddwn i’n ifancach yw pwysigrwydd dweud ie a pheidio â bod ofn. Roedd cryn ddiffyg hyder gen i na fyddwn i byth yn rhoi cynnig ar bethau newydd neu wahanol, a nawr dw i’n meddwl am yr holl gyfleoedd coll. Pe bawn i’n gallu rhoi cyngor i’r fi ifancach, y cyngor byddai ewch amdani a byddwch yn sicr bod camgymeriadau’n dystiolaeth dy fod di’n trio. Am unrhyw un mewn sefyllfa debyg, peidiwch â bod ofn cael eich gwrthod oherwydd pob tro ces i fy ngwrthod, mewn gwirionedd, roeddwn i’n cael fy arallgyfeirio i rywbeth gwell. Mae’n ymddangos yn amhosib nes i chi wneud e, ond heb drio, fyddwch chi byth yn gwybod.

Awgrym pwysicaf wrth ymgeisio am swyddi?

Rhowch y cyfle gorau posib o lwyddo i chi’ch hun ac, wedyn, manteisiwch ar y gwasanaethau cefnogaeth sydd ar gael i chi. Hefyd, mae’n rhaid cael ffydd ynoch chi eich hun ac yn eich gallu. Byddwch yn ddigon hyderus i ymgeisio am swyddi sydd yn ymddangos i fod y tu hwnt i’ch cyrraedd oherwydd pan ymgeisiais i am rolau rheoli, doeddwn i byth wedi dychmygu y byddwn i’n llwyddiannus, ond petawn i ddim wedi rhoi cynnig arni, fyddwn i ddim lle rydw i heddiw. Nid chi sy’n eich dal chi’n ôl, ond yn hytrach pwy rydych chi’n credu nad ydych chi. Mae popeth yn ein dysgu i ddefnyddio profiad er ein mantais – dim ond chi sy’n gallu penderfynu pa mor llwyddiannus rydych chi am fod!

Eich awgrym euraidd oll?

Fy nghyngor euraidd i byddai i beidio byth â throi lawr unrhyw gyfle, hyd yn oed os yw’n ymddangos i fod yn amherthnasol ar y pryd. Gwir gyfleoedd yw’r rheini nad ydym yn eu gweld yn syth ac maent yn cyrraedd ar adegau annisgwyl ac anghyfleus. Gall pob cyfle gynnig rhywbeth newydd, rhywbeth gwahanol, rhywbeth mwy, felly manteisiwch i’r eithaf i weld beth a ddaw. Yn lle ofni’r hyn nad ydych chi’n gwybod neu ddeall, byddwch yn chwilfrydig ac yn gyffrous achos gall y dyhead i ddysgu a darganfod pethau newydd a chwilio amdanynt arwain at fywyd llawer yn hapusach a llawnach – dyma rywbeth dw i wedi dysgu a nawr, dw i’n ddiolchgar am bob profiad, boed yn dda neu beidio, dw i wedi ei gael. Mae’n iawn i beidio â bod yn iawn, ond nid yw’r iawn i aros fel ‘na, felly newidiwch bethau er y gorau, byddwch yn feistr ar eich bywyd eich hun a byddwch yn llon!

James yw Dirprwy Gyfarwyddwr Cyflogadwyedd Gwell Swyddi, Gwell Dyfodol. I ddarganfod sut y gallwn eich cefnogi chi, ffoniwch: 01792 284450.

Eisteddon ni gyda’r Rheolwr Rhaglen Gyflogadwyedd, Mark James, a siaradon ni am sut mae bywyd yn gyfan gwbl ynglŷn â gwneud y mwyaf o gyfleoedd i roi’r cyfle gorau i’ch hunan i lwyddo. Y canlyniad? Stori gyrfa gymhellgar i’n hatgoffa bod rhaid i’n hawydd i lwyddo fod yn gryfach na’n hofn o fethiant bob tro, ac os credwn ni yn wirioneddol y gallwn ei wneud, fe allwn ni yn bendant!

Wnaethoch chi ddilyn addysg bellach neu uwch?

Gwnes i lefelau A-mewn Mathemateg, Daearyddiaeth ac Astudiaethau Cyfryngau ac heb wybod erioed beth roeddwn am ei wneud ar ôl yr ysgol. Roeddwn i’n gwybod fy mod i’n mwynhau busnes a thwristiaeth, felly roeddwn i’n awyddus i ddysgu rhagor am ddilyn y meysydd hynny ar lefel uwch. O ganlyniad, es i ymlaen i Brifysgol Abertawe i wneud gradd mewn Rheolaeth Twristiaeth. Mwynheais y brifysgol yn wirioneddol a phopeth oedd gan y cwrs i’w gynnig, ond roeddwn yn dal i fyw gartref ac efallai nad enillais i gymaint o annibyniaeth a sgiliau bywyd ag y gallwn pe bawn i wedi symud i ffwrdd. Fodd bynnag, roedd y Brifysgol yn brofiad eithriadol o gadarnhaol i mi lle dysgais i lawer, ac roedd dilyn addysg uwch yn bendant yn benderfyniad roeddwn i’n falch o’i wneud. Yn ystod fy ngradd cwblheais leoliad gwaith yn yr awdurdod lleol, gan weithio ar brosiect i gefnogi’r rheiny ddim mewn cyflogaeth, addysg na hyfforddiant (NEET). Roeddwn i wirioneddol wrth fy modd gyda’r profiad ymarferol a enillais yn ystod y cyfnod hwn, gan weithio’n agos gyda phobl oedd ag angen ein cefnogaeth fwyaf. Roeddwn i’n gwybod mai yn y math hwn o rôl roedd fy sgiliau a gwybodaeth yn gweddu orau, a phan raddiais, roeddwn i wedi fy nghyffroi ac yn obeithiol am fy ngyrfa a’r dyfodol.

Pa gyfeiriad wnaethoch chi ddilyn ar ôl y Brifysgol?

Ar ôl graddio, gweithiais i’r awdurdod lleol fel Gweithiwr Mynediad Ieuenctid, gan weithio’n agos gyda rhai 16-19 oed mewn perygl o ddod yn NEET. Roedd elfen adfer y rôl yn rhoi boddhad mawr iawn; roeddwn i wrth fy modd yn gweld pobl ifanc yn magu sgiliau newydd, hyder ac yn pen draw yn trawsnewid eu bywydau er gwell. Arhosais i yn y rôl hon am 3 blynedd cyn ceisio’n llwyddiannus am rôl fel Swyddog Prentisiaeth, yn edrych ar ôl prentisiaid adeiladu ledled De Cymru: her newydd a gwahanol iawn i mi ar daith fy ngyrfa. Roeddwn i wrth fy modd yn cefnogi datblygiad busnesau ac unigolion trwy brentisiaethau, a phrofais fodlonrwydd mawr wrth weld pobl yn dod yn eu blaenau. Teimlwn yn freintiedig i fentora a chefnogi prentisiaid fel y cyflawnent eu nodau ac roedd bod â’r ymdeimlad hwn o bwrpas yn gwneud i mi fod ag eisiau dilyn y math hwn o rôl cyfarwyddyd fel y gallwn i barhau i gefnogi pobl mewn unrhyw ffordd bosibl.

Pa ffurf gymerodd eich gyrfa ers hynny?

Arhosais yn y rôl Swyddog Prentisiaeth am 3 blynedd cyn chwilio am her newydd i ehangu fy mhrofiad. Cododd cyfle mewnol am Swyddog Ymgysylltu â Gweithwyr a Chyfathrebiadau, a cheisiais ac roeddwn i’n llwyddiannus. Roeddwn i’n gyfrifol am ddatblygu cysylltiadau gyda chyflogwyr ar draws yr ardal leol i gefnogi cyfleoedd lleoliad prentisiaeth a hyfforddiant ac roeddwn i’n ddiolchgar am y lefel newydd hon o gyfrifoldeb. Gwnes i’r rôl hon am flwyddyn cyn ceisio’n llwyddiannus am safle fel Swyddog Cysylltu Cyflogaeth i Workways+ gan gefnogi pobl diwaith tymor hir. Enillais lawer o brofiad defnyddiol yn ogystal â chysylltiad da ag ystod eang o fusnesau, ac arweiniodd fy sêl i adeiladu ar y profiad cysylltiedig â busnes hwn fi i geisio am rôl Cynghorwr Gweithlu yn rhaglen Gwell Swyddi, Gwell Dyfodol yng Ngholeg Gŵyr Abertawe. Roedd y rôl yn cyd-fynd â’m profiadau ac roedd ymgeisio amdani yn teimlo fel dilyniant gyrfa naturiol. Roeddwn i wrth fy modd yn y rôl yn ystod yr 8 mis cychwynnol, ac fe roeddwn i’n hapus iawn i symud ymlaen i rôl Rheolwr Prosiect. Rydw i wir yn mwynhau’r rôl hon ac yn hynod o werthfawrogol o’r cyfle. Mae’r rôl wedi gwella fy nealltwriaeth a fy mhrofiad o reoli yn weithredol ac yn strategol, ac rydw i wedi ennill profiadau gwerthfawr iawn a fydd yn fy helpu ar hyd fy nhaith gyrfa. Yn naturiol, nid yw popeth wedi bod yn fêl, ond os nad ydych chi’n mentro mewn bywyd, ni fyddwch yn datblygu na thyfu fel unigolyn. Wrth symud ymlaen, rydw i’n gyffrous iawn am botensial anferth yr Adran Gyflogadwyedd; pob dydd rwy’n profi’r effaith gadarnhaol y mae’n ei chael ar fywydau pobl, ac rydw i’n falch iawn o fod yn rhan o ddarpariaeth cymorth pwysig ac ystyrlon, yn enwedig yn ystod cyfnod heriol iawn yn economaidd. Roedd y rôl yn gyfle i fi ddefnyddio fy mhrofiadau perthnasol ac fe roedd yn teimlo fel y peth cywir i wneud er mwyn symud fy ngyrfa ymlaen. Fe wnes i fwynhau pob eiliad o’r 8 mis a dreuliais yn y rôl, cyn symud ymlaen i weithio fel Rheolwr Rhaglen. Rwy’n mwynhau’r rôl hon yn fawr ac yn ddiolchgar iawn am y cyfle. Mae’r rôl wedi gwella fy ngwybodaeth a fy mhrofiadau o reoli yn weithredol ac yn strategol, ac rydw i wedi cael nifer o brofiadau gwerthfawr a fydd yn fy helpu ar fy nhaith gyrfa reoli. Rydw i wedi profi ambell her ar hyd y ffordd, ond os nad ydych chi’n mentro, nid ydych yn debygol o ddatblygu fel person. Wrth symud ymlaen, rydw i’n gyffrous iawn am botensial yr Adran Gyflogadwyedd; rwy’n gweld yr effaith gadarnhaol mae’n ei gael ar bobl yn ddyddiol, ac rydw i wrth fy modd o fod yn chwarae rhan wrth ddarparu cymorth hanfodol ac ystyrlon yn enwedig yn ystod yr hinsawdd heriol economaidd sydd ohoni.

Beth yw’r un peth y dymunwch y byddech yn ei wybod pan oeddech yn iau?

Dw i’n dymuno na fyddwn i wedi poeni cymaint am y dyfodol a pheidio â chymharu fy hun â phobl eraill. Roeddwn i’n tueddu i orfeddwl pethau llawer, a phoeni am y ‘beth petai’ a dw i’n dymuno y byddwn i wedi credu yn fy hun yn llawer cynharach. Pe gallwn i roi cyngor i fy hunan yn iau byddai i beidio â cholli unrhyw gyfle sy’n dod i chi; cydiwch ym mhopeth a gwnewch bob ymdrech i wneud pob profiad yn un gwerthfawr. Dw i wedi dysgu llawer o bethau gwahanol yn fy holl rolau gwahanol ac maen nhw wedi fy ngwneud i y person ydw i heddiw. Wrth gwrs mae pethau a allai fod wedi cael eu gwneud yn wahanol o hyd ond dw i’n credu’n wirioneddol bod popeth yn dysgu rhywbeth i chi. Mae bywyd ynglŷn â bod yn amyneddgar, gweithio’n galed ac (yn y pen draw) medi’r gwobrau. Os ydw i’n gallu ei wneud e, gall unrhyw un!

Oes unrhyw benderfyniadau gyrfa rydych chi’n eu difaru?

Dw i ddim yn difaru pethau ond yn bendant mae cyfleoedd sydd wedi mynd heibio i mi. Dw i wedi bod mewn ychydig o rolau gwahanol lle mae cyfleoedd dyrchafiad wedi codi a dw i wedi bod yn rhy gyfforddus neu nerfus i gymryd mantais ohonynt. Mae hyn yn rhywbeth dw i ddim ond yn sylweddoli wrth fyfyrio ar stori fy ngyrfa, felly byddwn i’n dweud bod y sylweddoliad yn fwy o wers nac o ddifaru. Dim ond nawr dw i wedi dechrau credu yn fy hun a fy mhotensial. Dw i ddim yn meddwl y cymerais i fy ngyrfa ddigon o ddifrif ac nid oedd gen i gynllun mewn gwirionedd lle roeddwn i am fynd a beth roeddwn i’n dymuno ei gyflawni. Dw i’n llawer mwy sefydlog nawr ac yn teimlo’n bendant fy mod i’n mynd i’r cyfeiriad cywir. Os ydw i’n credu y gallaf i ei wneud e, pam lai; gall y dyfodol wastad fod yn well na’r presennol ac mae gennym y pŵer i’w wneud felly!

Prif gyngor wrth geisio am swyddi?

Fy mhrif gyngor fyddai i aros mor amyneddgar â phosibl. Gall chwilio am swydd fod yn heriol a rhwystredig tu hwnt, ond mae’n rhaid i chi geisio cadw’ch canolbwyntio yn glir a bod yn frwdfrydig. Os ydych chi’n chwilio am swyddi fy mhrif gyngor fyddai i gadw’ch chwilio yn berthnasol i chi a’ch sgiliau, ac os ydych chi’n newid swyddi, anelwch at wneud hynny’n feddylgar er mwyn gwneud y mwyaf o’r cyfleoedd. Po fwyaf y gwyddoch y mwyaf o wahaniaeth y gallwch chi ei wneud, ac mae hi gymaint yn haws i symud ymlaen os ydych chi’n dal i adeiladu ar eich gwyboaeth a phrofiad. Y ffordd at lwyddiant yw i weithredu’n benderfynol, ac os ydych chi’n credu hyn, gallwch ei gyflawni!

Beth yw eich darn eithaf o gyngor?

Peidiwch â bod yn rhy ofnus i gymryd risgiau; byddwch yn cael siomedigaethau ac mae hynny i’w ddisgwyl a gellir dysgu o hynny. Peidiwch â gadael i un cais, cyfweliad neu brofiad gyrfa gwael eich atal yn eich ymchwil am symud ymlaen. Dw i’n meddwl ei bod hi’n wirioneddol bwysigI i deimlo cyffro am beth sydd o bosibl i ddod yn eich gyrfa a’ch bywyd! Byddwch yn uchelgeisiol ond hefyd ceisiwch sefydlu proses wedi ei diffinio’n dda i gyflawni eich nodau; adnabyddwch eich gwerth a chadwch eich awydd i lwyddo yn fwy na’ch ofn o fethu!

Mark yw ein Rheolwr Rhaglen Gyflogadwyedd yn Gwell Swyddi, Gwell Dyfodol. Cysylltwch i weld sut y gall y rhaglen Gwell Swyddi, Gwell Dyfodol eich cefnogi chi neu eich busnes: 01792 284450.

“Ein hanghenion yw’n caffaeliadau mwyaf gwerthfawr. Fel mae’n digwydd, rydw i wedi dysgu i roi’r holl bethau sydd eu hangen arnaf i eraill.”

Cawson ni sgwrs â’r Hyfforddwr Gyrfa, Lynsey, am bwysigrwydd gwneud y mwyaf o bob cyfle a pheidio â chymryd bywyd yn rhy ddifrifol. Canlyniad y sgwrs? Stori yrfa gyffrous ac anturus sy’n profi nad yw hwyl a sbri yn atal unigolion rhag sicrhau bywyd llwyddiannus – maen nhw’n ffactorau sy’n cyfrannu’n gadarnhaol at wneud hyn!

A wnes di ddilyn llwybr addysg bellach/uwch?

Ar ôl i fi orffen ysgol, doedd gen i ddim diddordeb mewn mynd i’r coleg, ond oherwydd nad oedd gen i swydd ar y pryd, penderfynais mai’r peth gorau fyddai cyflwyno cais. Fe wnes i fwynhau’r rhyddid o ddewis beth roeddwn i am ei astudio ac fe ges i le ar gwrs Cynhyrchu Cerddoriaeth. Ar ôl blwyddyn o astudio a gweithio yn rhan-amser, roeddwn i’n poeni rhywfaint am fy nyfodol. Roedd cwmni telathrebu mawr yn recriwtio cynrychiolwyr gwasanaeth cwsmeriaid ar y pryd, felly fe ymgeisiais am rôl gyda nhw. Roedd fy nghais yn un llwyddiannus, ac fe weithiais fy ffordd trwy’r rhengoedd, fel petai, nes i mi dderbyn rôl Cydlynydd Hyfforddi a Datblygu. Yn y rôl hon, roedd gen i gyfrifoldeb am hyfforddi staff newydd ac uwchsgilio staff cyfredol. Fe sbardunodd hyn fy angerdd am gefnogi pobl!

Ar ôl treulio 7 mlynedd yn gweithio i’r cwmni, fe dderbyniais gynnig diswyddiad gwirfoddol. Roeddwn i’n barod am her newydd. Roedd gen i ysfa i deithio, felly penderfynais hedfan i Toronto am flwyddyn o waith! Yn sydyn, roeddwn i’n eistedd ar awyren yn mynd i Ganada, yn ddi-waith, heb unman i aros a heb ddillad addas ar gyfer dymheredd rhewllyd y wlad! Ar ôl setlo, fe ymgeisiais am rolau tebyg i’r rhai roeddwn wedi gweithio ynddynt yn ôl yn yr Iwerddon, a llwyddais i sicrhau rôl datblygu staff gyda chwmni darparu yswiriant iechyd. Yna, sylweddolais, doeddwn i ddim wedi teithio ar draws y byd i wneud yr un fath o waith, roeddwn i am gael profiadau newydd, felly fe wnes i sicrhau rôl mewn clwb gomedi fel gweinyddydd! Ar ôl 3 blynedd yng Nghanada, fe es i yn ôl i’r Iwerddon oherwydd roeddwn i’n hiraethu am fy nheulu. Er yr oeddwn i’n gwybod y byddwn i’n cael trafferth dod o hyd i waith yn Nulyn ar y pryd, oherwydd y lefelau diweithdra, doeddwn i ddim wedi rhagweld pa mor ddifrifol oedd y sefyllfa; dyma’r tro cyntaf i gael fy ngwrthod bob tro y byddwn i’n cyflwyno cais am swydd; roeddwn i’n ddigalon iawn ac roedd fy hyder yn pylu gyda’r awr, gan nad oedd gen i syniad o ran sut i symud ymlaen.

Ar ddiwrnod fy mhen-blwydd yn 32 oed, cefais epiffani a phenderfynais ei bod yn bryd i fi wneud yr hyn roeddwn i wedi eisiau ei wneud erioed, felly fe wnes i gyflwyno cais i astudio cwrs mynediad Gradd Seicoleg. Er nad oeddwn i wedi bod mewn addysg ers dros ddegawd, a’r ffaith yr oeddwn i’n poeni oherwydd mai fi oedd y person hynaf ar y cwrs, roedd hwn yn drobwynt personol anferth i fi; dangosodd i fi fy mod i’n gallu cyflawni unrhyw beth rydw i’n gweithio’n galed amdano, a chynyddodd fy hunanhyder yn syth o ganlyniad i hyn. Fe es i ymlaen i astudio gradd cydanrhydedd mewn Seicoleg a Chwnsela yn Abertawe gyda mynediad yn syth i’r ail flwyddyn. Fe wnes i fwynhau’r cyfnod yma, ac fe weithiais fel Cynorthwyydd Llyfrgell i Fyfyrwyr i redeg ochr yn ochr â fy astudiaethau.

Pa gyfeiriad wnes di ddilyn ar ôl cwblhau dy addysg?

Ar ôl cwblhau fy ngradd, fe benderfynais aros yn Abertawe. Gweithiais fel Goruchwylydd mewn tafarn Wyddelig yn y Mwmbwls wrth geisio gweithio allan fy nghynllun gyrfa hirdymor. Roeddwn i’n poeni bryd hynny am fy ngyrfa, ond yn dilyn sgwrs gyda fy mam, fe wnaeth hi fy ngorchymyn i “beidio â chymryd bywyd mor ddifrifol, mwynha dy hun” – rwy’n falch fy mod wedi gwneud hyn.

Ar ôl dwy flynedd yn y rôl hon, caeodd y dafarn ei ddrysau am y tro olaf a chefais fy niswyddo. Dyma oedd dechrau fy ngyrfa mewn cyflogadwyedd; Fe wnes i sicrhau rôl ag asiantaeth recriwtio, ac roeddwn i’n gyfrifol am helpu gyda chyfweliadau, ceisiadau a llawer o brosesau recriwtio eraill ar gyfer y diwydiannau Pensaernïol a Pheirianneg. Er fy mod wedi mwynhau’r rôl, roedd y ffocws ar gyflawni targedau, yn hytrach na chynnig cymorth i gleientiaid, felly ar ôl blwyddyn fe wnes i wneud cais i weithio fel Ymgynghorydd Recriwtio gyda Gwell Swyddi, Gwell Dyfodol; roedd ei hamgylchedd a’u gwerthoedd yn cyd-fynd â’r ffordd roeddwn i’n gweld y byd. Roeddwn i wrth fy modd pan ges i gynnig y swydd. Ar ôl ychydig fisoedd, fe gyflwynais gais ar gyfer swydd Hyfforddwr gyrfa, ac rydw i wedi bod yn gweithio yn y rôl byth ers hynny!

Wyt ti’n difaru unrhyw beth o ran dy yrfa?

Nac ydw, mae pob penderfyniad ar hyd fy nhaith wedi fy siapio i fel unigolyn. Mae pob dim rydw i wedi ei gyflawni o ran fy mywyd proffesiynol wedi digwydd ar amser, fel petai. Roedd mynd i’r brifysgol yn hŷn wedi fy helpu i wireddu fy mreuddwyd. Mae’r holl rolau rhan-amser wedi fy natblygu fel unigolyn ac wedi fy atgoffa i beidio â chymryd bywyd mor ddifrifol. Mae fy rolau mwy proffesiynol wedi rhoi llwyfan gwych i mi ddatblygu. Mae pethau wedi cwympo i’w lle hyd yn hyn ac rwy’n hapus ac yn edrych ymlaen ar gyfer y dyfodol!

Oes un peth yr hoffet ti fod wedi ei wybod pan oeddet ti’n iau?

Hoffwn pe bawn i wedi gwybod bod unrhyw beth yn bosib, cyn belled â’ch bod yn barod i weithio amdano. Trwy gydol fy 20au, roeddwn i’n teimlo pwysau i gymharu fy hun â fy nghyfoedion. Rwy’n credu’n gryf mewn cyflawni pethau ar gyflymder naturiol. Chi sy’n gyfrifol am eich llwybr, felly gwnewch yn siŵr ei fod yn llwybr unigol. Dilynwch eich angerdd chi, nid angerdd eraill!

Awgrymiadau defnyddiol ar gyfer ymgeisio am swyddi?

Os oes gennych ddiddordeb mewn ymgeisio am rôl, peidiwch ag aros nes eich bod yn diwallu pob un o’r meini prawf, byddwch yn uchelgeisiol – yr ateb gwaethaf y gallech chi ei gael yw na, ond mae ‘na’ yn gyfle ichi ddysgu a gwella. Mae’n bwysig ichi herio eich hun yn barhaus; os nad yw’r cyfle yn eich herio, ni fydd yn eich newid, felly ewch amdani gyda phopeth sydd gennych chi!

Cyngor gorau?

Os nad ydych yn siwr am eich dyfodol, cymerwch ran mewn cymaint o weithgareddau ag sy’n bosib; rhwydweithiwch â phobl, gwirfoddolwch, ymunwch â chlwb, does dim dal pwy allech chi gwrdd ag ef, a beth y gallwch ei gyflawni. Peidiwch ag ofni newid, beth bynnag yw’ch oed; pe bawn i wedi gweithio mewn un swydd, un yrfa, ers gadael yr ysgol, pwy â ŵyr beth fyddwn i’n ei wneud heddiw. Byddwn i’n sicr ddim yn gweithio mewn rôl rwy’n ei charu, yn hyfforddi pobl i sicrhau cyflogaeth ystyrlon. Yn y diwedd, rydyn ni’n difaru’n cyfleoedd nid ydym yn eu cymryd, felly cymerwch risg er mwyn llwyddo, ac mi fyddwch yn hapus. Os na fyddwch yn llwyddo, byddwch wedi ennill profiad ac yn ddoethach am hynny!

“Trin eraill fel yr hoffech chi gael eich trin – y peth gorau y gallwch ei wneud yw bod yn garedig.”

Cawson ni sgwrs â’r Ymgynghorydd Recriwtio Sarah am y ffaith mai ‘newid’ yw’r unig beth cyson mewn bywyd, a sut mae’r gallu i newid yn pennu eich llwyddiant. Canlyniad y sgwrs? Stori sy’n profi nad yw llwybrau gyrfa bob amser yn syml, ond rhaid inni beidio â stopio dysgu, oherwydd mae bywyd yn wers barhaus.

A wnaethoch chi ddilyn addysg bellach neu addysg uwch?

Es i i’r coleg i astudio’r Gyfraith, Saesneg ac Astudiaethau Crefyddol a llwyddo yn fy 3 chwrs Safon Uwch. Pan oeddwn i yn y coleg gweithiais i mewn nifer o swyddi rhan-amser o adwerthu i letygarwch, ac wrth edrych yn ôl, dwi’n teimlo bod hyn wedi fy mharatoi ar gyfer fy nhaith yrfa yn y dyfodol; o oedran ifanc, dwi wedi datblygu moeseg waith gref, dysgu pwysigrwydd parchu awdurdod, a dwi wedi ennill amrywiaeth o sgiliau pwysig o gyfathrebu effeithiol i ddatrys problemau yn effeithlon.

Ar ôl gadael y coleg roeddwn i’n siomedig nad oeddwn i wedi cael y graddau sydd eu hangen i ddilyn y gyfraith, felly yn lle hynny penderfynais i ddilyn cwrs gradd mewn Astudiaethau Cymdeithasol yn Swydd Stafford, oherwydd ar y pryd, roedd gwaith y llywodraeth yn apelio ataf yn fawr. Yn ystod fy nghyfnod yn Swydd Stafford, gweithiais i mewn nifer o swyddi rhan-amser yn y sector lletygarwch ac adwerthu; hwn oedd fy mhrofiad cyntaf o fod oddi cartref, a dysgais i lawer iawn o sgiliau gwerthfawr yn bersonol ac yn broffesiynol.

Pan adawais i’r Brifysgol manteisiais i ar y cyfle i warbacio ledled y byd, ac ymweld â llawer o wledydd gan gynnwys Awstralia, Singapôr, Tahiti a Los Angeles! I mi, roedd hwn yn brofiad mor werthfawr i archwilio gwahanol ddiwylliannau, ymgymryd â heriau newydd, a chael gwybod rhagor am gynifer o alwedigaethau. Roedd y profiad yn anhygoel ac mor werth chweil, ac roeddwn i’n hynod ddiolchgar i fachu ar y cyfle i deithio cyn setlo i lawr a chanolbwyntio ar y daith yrfa o’m blaen.

Sut mae’ch taith yrfa wedi datblygu?

Yn dilyn fy nheithiau dychwelais i i Abertawe a dechrau chwilio am fy ‘swydd go iawn’ gyntaf, a oedd ar y pryd yn golygu ymweld â’m canolfan waith leol. Roeddwn i’n hynod lwcus i gael cynnig gwaith gweinyddol yn y ganolfan, ac er nad oedd hyn yn rhan o’m cynllun gyrfa, roeddwn i mewn sefyllfa wych i ddechrau chwilio am gyfle mwy parhaol. Symudais i swydd Cynorthwyydd AD gyda’r GIG ar gontract chwe mis y gwnes i ei mwynhau’n fawr, gan weithio yn yr adran bersonél i gynorthwyo gyda recriwtio, datblygu staff, a chefnogi pobl yn gyffredinol i wneud yr hyn roedden nhw eisiau ei wneud! Pan ddaeth fy nghontract i ben, penderfynais i gymryd tipyn o risg a symud i Birmingham lle roedd fy ngŵr yn byw ar y pryd. Ymwelais i ag asiantaeth recriwtio a digwyddais i fod yn y lle iawn ar yr adeg iawn oherwydd ces i gynnig rôl Cynorthwyydd Gweinyddol yn yr asiantaeth yn ystod fy apwyntiad cyntaf! Wnes i fwynhau fy amser gyda’r sefydliad yn fawr, gan symud ymlaen yn y pen draw i Uwch Swyddog Recriwtio, ac ar ôl pum mlynedd yn yr asiantaeth, wnes i symud ymlaen i rôl Swyddog Recriwtio gyda llywodraeth leol, yn helpu unigolion i gael rolau yn y sector gofal. Yn ddiweddarach dychwelais i i Abertawe a sicrhau rôl recriwtio gyda’r sefydliad roeddwn i wedi gweithio iddo yn Birmingham, cyn symud i rôl yn Remploy lle arhosais i am bum mlynedd cyn cymryd absenoldeb mamolaeth i gael fy merch gyntaf.

A wnaeth dy lwybr gyrfa newid cyfeiriad ar ôl i chi gael plant?

Ar ôl dau gyfnod o absenoldeb mamolaeth, penderfynais i adael byd gwaith i ddod yn fam amser llawn. Dwi’n hynod ddiolchgar am fod yn ddigon ffodus i dreulio ychydig flynyddoedd cyntaf bywydau fy mhlant yn eu gwylio nhw yn tyfu i fyny ac yn cyrraedd eu holl gerrig milltir pwysig. Pan ddechreuodd y ddwy ferch yn yr ysgol, roedd yn teimlo fel yr amser perffaith i ddod o hyd i swydd ran-amser. Teimlais i dros amser fy mod i wedi colli rhan o’m hunaniaeth a llawer o hyder, ac roeddwn i’n barod i ymgymryd â rôl ychwanegol yn ogystal â bod yn ‘fam’. Wnes i sicrhau rôl adwerthu ran-amser cyn ceisio gwaith amser llawn trwy’r rhaglen Gwell Swyddi, Gwell Dyfodol. Ar y pryd, roedd y rhaglen yn ei dyddiau cynnar ac roedd fy Hyfforddwr wedi rhoi gwybod i mi am rôl recriwtio yn y sefydliad a oedd o ddiddordeb mawr i mi. Wnes i ymgeisio amdani ac roeddwn i’n llwyddiannus! Roeddwn i fel y gog! Roeddwn i mor barod am her newydd sbon a dwi wedi gwirioni arni byth ers hynny!

Oes un peth yr hoffech chi fod wedi ei wybod pan oeddech chi’n iau?

Wrth edrych yn ôl, hoffwn pe bawn wedi sylweddoli nad oes unrhyw benderfyniadau anghywir mewn bywyd; rydych chi’n dysgu o bob profiad felly does dim difaru! Yn sicr, dwi wedi gweithio mewn rhai rolau nad oedden nhw’n iawn i mi, ond mae’r profiadau hyn yn adeiladu cymeriad ac yn eich helpu i wneud y dewisiadau cywir yn y dyfodol; peidiwch byth â rhoi’r gorau i ddysgu oherwydd mae bywyd yn parhau i addysgu!

Cyngor gorau ar gyfer ymgeisio am swyddi?

Fy nghyngor gorau yw mentro bod yn wahanol. Mae’n bwysig bod â’r hyder i sefyll allan a chael pobl i sylwi arnoch am yr holl resymau cywir. Mae cyflogwyr wrth eu bodd yn gweld ymgeiswyr sy’n angerddol am y rôl a’r sefydliad, felly dangoswch eich gwybodaeth a dweud wrthynt pam rydych chi’n ffit perffaith ar gyfer eu diwylliant, eu gwerthoedd a’u gweledigaeth! Er ei bod yn bwysig diwallu’r holl feini prawf hanfodol, cofiwch fod cyflogwyr hefyd yn gwerthfawrogi profiadau bywyd a pha bersonoliaeth y gallwch ddod â hi i’r rôl – cofleidiwch yr hyn sy’n eich gwneud chi’n unigryw!

Beth yw’ch cyngor yn gyffredinol?

Y cyngor cyffredinol gorau y gallaf ei roi yw bod yn chi’ch hun. Camgymeriad mawr y mae pobl yn ei wneud yn aml yw ceisio bod yn rhywun nad ydyn nhw, a cheisio portreadu’r hyn maen nhw’n meddwl y mae pobl eisiau ei weld. Dim ond man cychwyn yw’r cyfweliad – os ydych chi’n mynd i lwyddo mewn rôl bydd angen i chi ategu’r wybodaeth a roddoch chi a dangos yr holl rinweddau cadarnhaol y gwnaethoch chi dynnu sylw atynt. Byddwch yn hyderus yn eich hun a byddwch yn chi’ch hun – peidiwch â cheisio bod yn rhywun arall. Byddwch yn ostyngedig yn eich hyder ac yn ddewr yn eich cymeriad!